БОЛОРАВИИ МУЗДИ МАОШ, НАФАҚА ВА СТИПЕНДИЯ. Ин мавзӯъро корманди масъули Вазорати молия Назокат Одиназода шарҳ медиҳад

 

Vazorati-moliya-byudzhet
Тавре қаблан иттилоъ додем,  аз 1 сентябри соли 2020 дар Тоҷикистон маоши вазифавии кормандони соҳаҳои буҷетӣ, бахусус маориф, тандурустӣ, ҳифзи иҷтимоӣ, илму фарҳанг, мақомоти ҳокимияти идораи давлатӣ, ҳифзи ҳуқуқ ва мудофиа, инчунин, андозаи стипендияҳои амалкунандаи донишҷӯёни муассисаҳои таҳсилоти олию миёнаи касбӣ ва дигар намуди стипендия,  ҳадди ақали нафақа аз рӯи синну сол, нафақаи заминавӣ ва нафақаи меҳнатӣ аз рӯи синну сол зиёд мегардад.

Дар ин мавзӯъ хабарнигори АМИТ «Ховар» Марзия САИДЗОДА бо сардори шуъбаи идоракунии буҷети  соҳаи тандурустӣ, ҳифзи иҷтимоӣ ва варзиши Вазорати молияи Ҷумҳурии Тоҷикистон Назокат ОДИНАЗОДА ҳамсуҳбат гардид.

Соҳаи маориф  

Номбурда дар суҳбат гуфт, ки шурӯъ аз 1 сентябри соли 2020 маоши вазифавии роҳбарон, кормандон ва муаллимони муассисаҳои томактабӣ ва таҳсилоти миёнаи умумӣ, муассисаҳои давлатии маркази рушди истеъдодҳо, маркази технологияи иттилоотию коммуникатсионӣ, маркази ҷумҳуриявии таълимию методӣ ва муассисаҳои таҳсилоти иловагӣ, ҳамзамон мактабҳои президентӣ, литсейҳо, гимназияҳо, ҳамаи мактаб-интернатҳо, инчунин мураббиёни муассисаҳои томактабӣ, аз ҷумла кӯдакистон ва боғчаҳои кӯдакона ба андозаи 15 фоиз зиёд карда мешавад. Дар натиҷа аз 1 сентябри соли 2020 ба ҳисоби миёна маоши вазифавии мураббиёни кӯдакистон ва боғчаҳои кӯдакона аз 729 сомонӣ ба 838 сомонӣ, муаллими тахассуси дараҷаи олӣ дар муассисаҳои таҳсилоти миёнаи умумӣ аз 896 сомонӣ ба 1030 сомонӣ расонида мешавад.

Ҳамзамон меъёри иловапулиҳо ба маоши вазифавии муаллимони муассисаҳои таҳсилоти умумие, ки сарбории роҳбарии синфӣ ва мудири кабинетро ба уҳда доранд ва инчунин тафтиши дафтар мегузаронанд, мутаносибан 15, 10 ва 20 фоизро ташкил медиҳад. Бо дарназардошти чунин иловапулиҳо маоши муаллими тахассуси дараҷаи олии дорои маълумоти олӣ 1300 сомониро ташкил медиҳад.

 

«Маоши вазифавии кормандони дигар муассисаҳои соҳаи маориф — муассисаҳои таҳсилоти ибтидоӣ ва миёнаи касбӣ, аз ҷумла литсейҳои касбӣ-техникӣ ва коллеҷҳо, муассисаҳои таҳсилоти олии касбӣ ва баъдидипломӣ, мактабҳои махсуси варзишӣ, донишкадаю марказҳои такмили ихтисос ба андозаи 15 фоиз зиёд карда мешавад. Дар баробари ин ба кормандони чунин муассисаҳо, ки унвони илмӣ доранд, иловапулӣ ба андозаи 30 фоиз пардохт мегардад. Ҳамзамон музди меҳнати кормандони соҳаи илм, фарҳанг, ҳифзи иҷтимоӣ ва соҳаҳои воқеии иқтисодиёт аз 1 сентябри соли 2020 ба андозаи 15 фоиз зиёд карда мешавад. Вобаста ба ин маоши вазифавии сарходими илмии институтҳои Академияи миллии илмҳо, Академияи илмҳои кишоварзӣ,  Академияи таҳсилоти Ҷумҳурии Тоҷикистон ба ҳисоби миёна бо дарназардошти унвони илмӣ ба 1752 сомонӣ ва сарходими илмии муассисаҳои дигари соҳаи илм ба 1140 сомонӣ расонида мешавад», — афзуд Назокат Одиназода.

Инчунин маоши вазифавии кормандони маъмурии хона-интернатҳо барои кӯдакони ноқисулақл ба 1714 сомонӣ, барои касалиҳои рӯҳии калонсолон ба 1937 сомонӣ ва барои пиронсолон ба 1273 сомонӣ, ҳамзамон кормандони маъмурии дигар муассисаҳо (осоишгоҳҳо, литсей-интернати касбии махсуси маъюбон ва шуъбаҳои кумаки иҷтимоӣ дар хона) ба ҳисоби миёна ба 1330 сомонӣ расонида мешавад.

Аз 1 сентябри соли ҷорӣ музди меҳнати моҳонаи вазифавии ҳунарманди дараҷаи олии театрҳо ба 1605 сомонӣ, роҳбалади осорхонаҳо ва муҳаррири муассисаҳои матбуоти даврӣ ба 1057 сомонӣ ва мудири китобхонаи ноҳия ба 1277 сомонӣ баробар мегардад.

Соҳаи тандурустӣ 

Дар асоси  Фармони Сарвари давлат инчунин музди меҳнати кормандони муассисаҳои соҳаи тандурустӣ, ки аз ҳисоби буҷети давлатӣ маблағгузорӣ мешаванд, ба андозаи 15 фоиз зиёд гардида, пардохти он аз рӯи дастурамал оид ба пардохти музди меҳнат амалӣ мегардад ва андозаи маоши заминавӣ барои ҳисоб намудани маоши вазифавии кормандони соҳаи мазкур ба 305 сомонӣ (ҳоло ин нишондиҳанда 265 сомониро ташкил медиҳад) баробар карда шуд. Назокат Одиназода мегӯяд, ки дар ин робита дар беморхонаҳо ва марказҳои тиббӣ маоши вазифавии сартабибон ба ҳисоби миёна ба 1737 сомонӣ, табиби категорияи олӣ ба 1255 сомонӣ, дар марказҳои саломатии шаҳру ноҳияҳо маоши вазифавии сартабибон ба ҳисоби миёна ба 2118 сомонӣ ва табиби категорияи олӣ ба 1548 сомонӣ баробар мегардад.

Хизматчиёни давлатӣ  

Бо мақсади ҳавасманд намудани хизматчиёни давлатӣ ва ҷалби мутахассисони болаёқат ба мақомоти идораи давлатӣ, мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот андозаи маоши заминавӣ ҳамчун асоси коэффисиентҳои тарифӣ барои мансабҳои маъмурии категорияҳои панҷум, шашум, ҳафтуми хизмати давлатӣ аз 1 сентябри имсол дар ҳаҷми 690 сомонӣ ва дар ҳамон мақомоти зикргардида барои мансабҳои маъмурии категорияҳои олӣ, якум, дуюм, сеюм, чоруми хизмати давлатӣ 620 сомонӣ муқаррар карда шудааст, ки вобаста ба ин зиёдшавии музди меҳнати онҳо 15 фоизро ташкил медиҳад. 

Мақомоти идораи давлатӣ, ҳифзи ҳуқуқ ва қудратӣ  

Маоши вазифавии кормандони ҳайати техникӣ ва хизматрасони мақомоти идораи давлатӣ, мақомоти судӣ ва прокуратура, мудофиа, мақомоти ҳифзи ҳуқуқ, мақомоти иҷроияи маҳаллии ҳокимияти давлатӣ ва мақомоти худидоракунии шаҳрак ва деҳот, ки аз ҳисоби буҷети давлатӣ маблағгузорӣ мешаванд, ба андозаи 15 фоиз зиёд мегардад.

Маоши вазифавии хизматчиёни ҳарбӣ, ҳайати шахсии қаторӣ ва роҳбарикунандаи мақомоти корҳои дохилӣ, мақомоти прокуратура ва дигар мақомоти ҳифзи ҳуқуқ ба андозаи 10 фоиз зиёд карда мешавад. Ҳамзамон афзоиши маоши заминавӣ барои ҳисоб намудани коэффитсиентҳо барои рутбаҳои ҳарбии хизматчиёни ҳарбӣ ва махсуси кормандони мақомоти ҳифзи ҳуқуқ, аз рутбаи қаторӣ то лейтенант аз 600 сомонӣ ба 690 сомонӣ ва аз рутбаи лейтенанти калон то генерали артиш аз 540 сомонӣ то 620 сомонӣ, яъне 15 фоиз зиёдшавӣ муқаррар карда шудааст.

Андозаи стипендияҳои амалкунандаи донишҷӯёни муассисаҳои таҳсилоти миёна ва олии касбӣ ба андозаи 15 фоиз зиёд мегардад.  Бояд зикр кард, ки   бо қарори Ҳукумати Ҷумҳурии Тоҷикистон аз 31 майи соли 2019 андозаи стипендияи давлатии академӣ дар муассисаҳои таҳсилоти миёна ва олии касбӣ–яъне коллеҷҳо ба андозаи зерин муқаррар карда шудааст: барои донишҷӯёне, ки дорои баҳои аъло мебошанд дар як моҳ 150 сомонӣ бо дарназардошти 15 фоиз зиёдшавӣ – 172,50 сомонӣ, барои донишҷӯёне, ки дорои баҳои хуб мебошанд, дар як моҳ 105 сомонӣ бо дарназардошти 15 фоиз зиёдшавӣ – 120,75 сомонӣ, барои донишҷӯёне, ки дорои баҳои қаноатбахш мебошанд, дар як моҳ 40 сомонӣ бо дарназардошти 15 фоиз зиёдшавӣ – 46 сомониро ташкил медиҳад.

-Аз 1 сентябри соли 2020 андозаи ҳадди ақали нафақа аз рӯи синну сол ва нафақаи заминавӣ ва андозаи ҳадди ниҳоии нафақаи меҳнатӣ аз рӯи синну сол 15 фоиз зиёд карда шуда, мувофиқан ба андозаи 207 сомонӣ ва 978 сомонӣ муқаррар карда мешавад,- мегӯяд корманди масъули Вазорати молияи мамлакат.

Ҳамзамон андозаи нафақаҳои меҳнатии амалкунандаи нафақагироне, ки кор намекунанд (ба истиснои аъзои хоҷагиҳои деҳқонӣ), бе дарназардошти нафақа барои хизматҳои дарозмуддат ва хизматҳои махсус дар назди Ҷумҳурии Тоҷикистон 15 фоизи ҳадди ақали нафақаи меҳнатӣ аз рӯи синну сол зиёд мегардад.

Андозаи нафақаҳои иҷтимоӣ аз рӯи синну сол (ба ғайр аз модароне, ки даҳ фарзанд таваллуд намуда, онҳоро то синни ҳаштсолагӣ тарбия намудаанд), кӯдакони маъюби то 18-сола, дигар гурӯҳҳои маъюбон, ки кор намекунанд ва ба нигоҳубин ниёз доранд,  ба онҳо нафақа дар асоси Қонуни Ҷумҳурии Тоҷикистон «Дар бораи таъмини нафақаҳои шаҳрвандони Ҷумҳурии Тоҷикистон» таъйин шудааст, ба андозаи 50 фоизи ҳадди ақалли нафақаҳои меҳнатӣ аз рӯи синн зиёд карда мешавад.

Дар баробари ин, қисми суғуртавии нафақаи нафақаҳои суғуртавии то 1 январи соли 2020 таъйингардидаи нафақагироне, ки кор намекунанд (ба истиснои аъзои хоҷагиҳои деҳқонӣ), ба андозаи 8 фоиз индексатсия карда мешаванд.

Дар посух ба саволи мо дар мавриди он ки зиёд намудани музди меҳнат аз кадом сарчашмаҳо таъмин мегардад, корманди масъули Вазорати молияи  мамлакат посух дод, ки маблағгузории зиёдшавии музди меҳнати кормандони соҳаҳои буҷетӣ, нафақа ва стипендия дар 4 моҳи соли равон аз ҳисоби маблағҳои дар буҷети давлатии Ҷумҳурии Тоҷикистон барои фонди музди меҳнат ва таъминоти нафақа пешбинишуда, маблағҳои бақияи озод, иҷрои барзиёди даромади буҷетҳои ҷумҳуриявӣ, маҳаллӣ, суғуртаи иҷтимоӣ ва нафақа, инчунин аз ҳисоби сарфаи дигар моддаҳои хароҷот ва маблағҳои махсуси муассисаҳо ва ташкилоти буҷетӣ пурра таъмин карда мешавад.

 

 

 

Садо

Навор

Ҳама наворҳо